Ինչն է ամենաշատն անհանգստացնում գործատուին թեկնածուի պահվածքում
Եթե դուք հաճախ դիմում եք աշխատանքի, սակայն հարցազրույցից հետո ձեզ մերժում են, ապա ամենայն հավանականությամբ, ինչ-որ բան սխալ եք անում հենց հարցազրույցի փուլում, ինչի արդյունքում հավաքագրման մասնագետը, ով հավանել է ձեր ռեզյումեն և հրավիրել հարցազրույցի, այժմ կարծում է, թե դուք այնքան էլ չեք համապատասխանում առաջարկվող պաշտոնին։ Մեր այսօրվա բլոգում կխոսենք այն գործոնների մասին, որոնց ուշադրություն են դարձնում հավաքագրման մասնագետները՝ թեկնածուների հետ աշխատելիս։
Ոչ ազնիվ լինելը
Սա կարող է տարբեր կերպ դրսևորվել։ Թեկնածուն կարող է ստել նախկին պաշտոնը ներկայացնելիս կամ ներկայացնել իրեն այնպիսին, ինչպիսին իրականում չէ։ Արհեստական ինտելեկտի միջոցով ստեղծվող բովանդակության աճը գործատուներին ստիպում է ավելի զգույշ լինել և ռեզյումեում առկա տեղեկատվությունը ստուգել հարցազրույցի ընթացքում՝ տալով ձեր նշած փորձի վերաբերյալ հարցեր և խնդրելով բերել կոնկրետ օրինակներ։
Կոպիտ վարքագիծ
Թեկնածուի հետ շփման առաջին իսկ պահից հավաքագրողները փորձում են հասկանալ, թե ինչպիսի անհատի և մասնագետի հետ գործ ունեն։ Հաճախ մարդիկ ձախողում են նոր աշխատավայրում ոչ թե մասնագիտական որակների, այլ միջանձնային հաղորդակցման հմտությունների բացակայության պատճառով։ Սա ենթադրում է, որ չնայած ձեր տեխնիկական հմտությունները առաջնային են, գործատուները գնահատում են նաև ձեր միջանձնային հաղորդակցության հմտությունները և հուզական ինտելեկտը: Ձեր վարքագիծն օգնում է նրանց գնահատել, թե որքան լավ կհարմարվեք թիմին և աշխատանքային միջավայրին:
Հարցազրույցին նախապատրաստված չլինելը
Հավաքագրման մասնագետները զգալի ժամանակ են հատկացնում թեկնածուների հարցազրույցները կազմակերպելու համար, և նրանք ակնկալում են, որ դուք ևս ջանքեր կգործադրեք՝ ցույց տալու համար, որ իսկապես հետաքրքրված եք։ Մինչ հարցազրույցի գնալը ուսումնասիրեք ընկերությունը և նրա գործունեության ոլորտը։ Մտածեք, թե ձեր որ հմտություններն են լավագույնս համապատասխանում ընկերության սկզբունքներին և պահանջներին։
Նախկին գործատուներին կամ գործընկերներին քննադատելը
Մարդիկ հաճախ տարաձայնություններ են ունենում աշխատավայրում։ Այնուամենայնիվ, հարցազրույցի ժամանակ նախկին գործընկերների և աշխատանքի քննադատությունը կարող է վատ անդրադառնալ աշխատանքի առաջարկ ստանալու ձեր հնարավորությունների վրա։ Գործատուն ուզում է տեսնել, որ դուք կարող եք պրոֆեսիոնալ կերպով հաղթահարել մարտահրավերները և առաջ շարժվել դրական տրամադրվածությամբ: Եթե դուք սկսեք քննադատել նախորդ աշխատանքը, գործատուն կարող է մտածել, որ կդժվարանք հարմարվել նոր միջավայրին:
Կհետաքրքրեն նաև
